Geger “Poek Mongkleng” Sanggeus Ngopi jeung Dahar Samangka, Tetela Aya Nu Tibalik

BANDUNG BARAT — Aya-aya wae kajadian anu dialaman ku warga. Hiji carita anu sumebar di kalangan warga jadi bahan seuri, tapi sakaligus ngingetkeun urang sangkan leuwih taliti dina kahirupan sapopoe.

Dicaritakeun, hiji warga anyar hudang sare rék indit gawé. Sanggeus mandi, anjeunna ngopi heula tuluy dahar samangka tiis anu disimpen dina kulkas.

Teu aya tanda-tanda nanaon. Kondisina disebut séhat jeung teu aya keluhan. Sanggeus rék indit maké motor, ujug-ujug panonna teu bisa ningali. Sakurilingna karasa poék mongkleng.

Kaget jeung panik, anjeunna mimiti kesang tiis. Bari ménta tulung, anjeunna ogé maca istighfar. Kulawarga jeung tatangga anu aya di sabudeureunana langsung ngabantu.
Sanggeus diperhatikeun leuwih taliti, kakara kapanggih hiji hal anu teu disangka-sangka.
Helm anu dipaké ternyata tibalik.

Jadi, lain lantaran ngopi, lain lantaran dahar samangka tiis, komo deui lain lantaran aya kajadian anu matak sieun. Panonna poék lantaran posisi helm anu salah.

Carita ieu tangtu jadi bahan seuri. Tapi aya hiji hal penting anu bisa dicokot: ulah buru-buru panik nalika ngalaman hiji kajadian anu teu biasa. Pariksa heula naon anu sabenerna kajadian.
Sakapeung, hal anu dianggap serius téh bisa waé ngan kusabab urang kurang taliti.

“Sing ati-ati jeung taliti, mugia teu kaalaman ku urang. Sanés nanaon, isin ku batur,” ceuk warga bari seuri.

Alhamdulillah, ahirna teu aya kajadian serius. ***